Við vinnum fyrir þig

Translate to

Lægsta verðið á notuðum námsbókum hjá A4

 A4 í Skeifunni var oftast með lægsta verðið og Penninn-Eymundsson í Kringlunni oftast með hæsta verðið þegar Verðlagseftirlit ASÍ kannaði verð á 26 algengum notuðum námsbókum fyrir framhaldsskóla. Könnunin var gerð fimmtudaginn 10. ágúst. Misjafnt var hversu margir þeirra titla sem skoðaðir voru fengust í verslununum. Í A4 Skeifunni fengust allir 26 titlarnir, 25 fengust hjá Heimkaup.is en Penninn-Eymundsson átti fæsta eða 16.

Verðmunur á notuðum bókum á skiptimörkuðum
Lægsta verðið var oftast hjá A4 Skeifunni eða á 17 titlum af 26, þar á eftir kom Heimkaup.is með lægsta verðið á 9 titlum. Penninn-Eymundsson Kringlunni var oftast með hæsta verðið í könnuninni eða á 14 titlum af 26.

Mesti verðmunurinn í könnuninni var á bókinni „Íslenska eitt“, sem var dýrust hjá Pennanum-Eymundsson Kringlunni 4.078 kr en ódýrust 2.599 kr hjá A4, það gerir 1.479 kr verðmun eða 57%. Einnig munaði miklu á verði á „Þýska fyrir þig 1“, lesbók, sem var á 2.878 kr hjá Pennanum-Eymundsson en 1.899 kr. hjá A4, sem er 979 kr verðmunur eða 52%.

Marg borgar sig að kaupa notaða bók
Þegar útsöluverð á nýjum og notuðum bókum er borið saman kemur í ljós að það er mun hagstæðara að kaupa notaða bók en nýja. Verðmunurinn í verslununum er misjafn en mestur verðmunur var hjá A4 á „Almenn jarðfræði“ sem kostar þar ný 8.289 kr. en notuð 3.199 kr sem er 159% munur. Minnstur verðmunur á notaðri og nýrri bók var hjá Pennanum-Eymundsson á „Saga listarinnar“ sem kostar þar ný 5.499 kr. en notuð 4.199 kr. sem er 31% verðmunur. Svo má ekki gleyma því að það er betra fyrir umhverfið að bækur séu notaðar oftar en einu sinni.

Sjá nánari niðurstöður í töflu

Hér er hægt er að skoða verð nýrra, notaðra og mismun í prósentum

Rétt er að geta þess að ekki var hægt að bera saman innkaupsverð verslana á notuðum bókum að þessu sinni þar sem verð fengust ekki uppgefin hjá Pennanum-Eymundsson Kringlunni.

Kannað var verð í eftirtöldum verslunum Pennanum-Eymundsson Kringlunni, A4 Skeifunni og á Heimkaup.is. Hér er aðeins um beinan verðsamanburð að ræða, en ekki er lagt mat á gæði eða þjónustu söluaðila. Rétt er að taka fram að ástand notaðra bóka getur verið mjög misjafnt.

Óheimilt er að vitna í könnunina í auglýsingum eða við sölu nema með heimild ASÍ.

Sjá einnig aðra frétt ASÍ um lægsta verið á nýjum bókum: