Við vinnum fyrir þig

Translate to

Verkalýðsfélag Grindavíkur 80 ára

Þann 13. febrúar  sl. eru 80 ár síðan Verkalýðsfélaga Grindavíkur var stofnað. Haldið var uppá afmælið með viðeigandi síðustu helgi  og Báran stéttarfélag óskar Grindvíkingum til hamingju með daginn. Í tilefni tímamótanna gaf félagið út veglegt afmælisrit og fylgir hér afmælisgrein sem Drífa Snædal framkvæmdastjóri Starfsgreinasambandsins skrifaði í ritið:

Fyrir hönd Starfsgreinasambands Íslands óska ég félögum í Verkalýðsfélagi Grindavíkur innilega til hamingju með áttatíu ára afmæli félagsins. Það er vonandi óþarfi að tíunda mikilvægi stéttarfélaga og árangur þeirra síðustu áratugina. Stéttarfélög eru einfaldlega vettvangur vinnandi fólks til að vera sterkari saman sem heild en sem einstaklingar. Með þeim styrk hefur vinnandi fólki tekist að byggja upp almannatryggingar, sjúkrarétt, styttingu vinnuviku, atvinnuleysistryggingar, starfsmenntun, endurhæfingu og orlofssjóði svo eitthvað sé nefnt en fyrst og fremst fjallar baráttan um að fá sanngjarnt gjald fyrir vinnuframlagið. Þangað eigum við enn nokkuð í land því taxtalaunin eru ennþá lægri en kostar að framfleyta sér og sínum.

Við náðum árangri í síðustu kjarasamningum og það er áhugavert að rifja það upp hversu fáránlegar kröfur okkar þóttu í upphafi, þ.e. krafan um hækkun lágmarkslauna í 300 þúsund krónur. Hér myndi allt fara á hliðina vegna botnlausrar græðgi launafólks og við bærum ábyrgð á næsta hruni sem væri óumflýjanlegt. Eftir því sem viðræðurnar hörðnuðu gátum við sýnt fram á að við gætum og myndum beita aflinu sem felst í samstöðunni til að fylgja eftir okkar kröfum. Þær voru ekki úr lausu lofti gripnar heldur voru þetta kröfur vinnandi fólks um allt land og við sem sátum við samningaborðið vorum einungis málpípur fólksins. Þó að við höfum þurft að kyngja ýmsu á lokametrum samninganna þá náðust megin markmið okkar eftir tvo og hálfan dag í verkfalli.

Við undirbúning verkfallsins fór ég víða um landið og mér er sérstaklega minnisstæður fundur í Grindavík. Hann var vel sóttur og fundargestir endurspegluðu þá fjölbreytni sem er að störfum í bænum. Spurningarnar voru beittar og fólk greinilega tilbúið í baráttuna. Það kom enda í ljós í atkvæðagreiðslunum þar sem þátttakan var með besta móti í Grindavík og niðurstaðan afgerandi. Þarna var kominn sönnun þess að launafólk í Grindavík stendur þétt saman í baráttunni og þessi afgerandi niðurstaða nýttist okkur við samningaborðið. Baráttan sem við stóðum í á vordögum 2015 nýttist okkur ekki einungis í þeim viðræðum heldur vita viðsemjendur okkar núna að verkafólk um allt land er tilbúið, baráttuglatt og samstillt þegar kemur að viðræðum. Það mun hafa áhrif til lengri tíma og styrkja okkar stöðu.

Þó að verkalýðsfélög séu komin til ára sinna þá eru þau háð endurnýjun, að innan þeirra blandist saman reynsla og nýliðun og öll flóra vinnumarkaðarins. Þegar Starfsgreinasambandið blés til fyrsta fundar ungliða innan aðildarfélaganna þá varð Grindavík fyrir valinu sem ákjósanlegur staður fyrir þennan fyrsta fund. Það verður lengi í minnum haft þvílíka virðingu og gestrisni Grindvíkingar sýndu unga fólkinu innan hreyfinarinnar og það hafði þau áhrif að strax var krafist þess að þetta yrði gert að árlegum viðburði.

Þau kynni sem ég hef haft af fulltrúum Verkalýðsfélags Grindavíkur gefur mér vonir um að félagið megi áfram vaxa og dafna og halda áfram að vera sú umgjörð fyrir baráttu launafólks sem þörf er á því næg eru verkefnin. Ég hlakka til áframhaldandi samstarfs og óska þess að félagið megi eiga önnur baráttuglöð og framsækin 80 ár!

Drífa Snædal