Lög Bárunnar stéttarfélags 

I. Kafli. 

Heiti félagsins og hlutverk. 

1. grein 
Félagið heitir Báran, stéttarfélag. Starfssvæði þess er Selfoss, Eyrarbakki, Stokks­eyri, Sandvíkur-, Hraungerðis-, Villingaholts- Gaulverjabæjar- Grímsnes-, Þingvalla-, Laugardals-, Biskupstungna-, Skeiða-, Hruna­manna-, og Gnúpverjahreppar. Félagið er aðili að Alþýðusambandi Íslands. Heimili félagsins og varnarþing er Selfoss. 

2. grein 
Tilgangur félagsins er: 
-Að sameina alla starfandi launamenn sem starfa á félagssvæðinu. 
-Að vinna að sameiginlegum hagsmunamálum félagsmanna, svo sem með því að semja um kaup og kjör, bættan aðbúnað við vinnu og gæta þess að ekki sé gengið á rétt félagsmanna. 
-Að vinna að fræðslu og menningarmálum. 

3. grein 
Að fengnu samþykki félagsfundar er heimilt að stofna innan félagsins starfsgreinadeildir, sem þá taka formlega til starfa frá og með næsta aðalfundi félagsins. Einnig er heimilt á sama hátt að taka í félagið í heild önnur verkalýðsfélög sem starfa sjálfstætt í einstökum starfsgreinum, enda hafi borist um það formleg umsókn frá viðkomandi félagi. 

Stjórn hverrar deildar skipa 3 menn. Formaður, varaformaður og ritari. Stjórnin skal kosin á aðalfundi viðkomandi deildar sem halda skal árlega. Þá skal kjósa 3 varamenn. 

Sérkostnaður vegna starfsemi deildanna skal samkv. ákvörðun aðalstjórnar greiddur úr félagssjóði. Ákvæði þessarar greinar skerða ekki valdsvið trúnaðarmannaráðs. 

4. grein 
Inngöngu í félagið geta þeir fengið sem: 
a) Vinna, hafa unnið eða eru að hefja störf er 2. gr. a – liður greinir frá. 
b) Eru fullra 16 ára að aldri. 
c) Standa ekki í óbættum sökum við félagið eða önnur stéttarfélög innan ASÍ, sem viðkomandi hafa verið í. 
d) Eru ekki fullgildir félagsmenn í öðru félagi innan ASÍ. 

5. grein 
Sá sem óskar inngöngu í félagið skal senda skriflega inntökubeiðni til stjórnar félagsins eða þess sem hún vísar til. Inntökubeiðnin skal borin upp á fundi stjórnar og samþykki meirihluti mættra stjórnarmanna inntökubeiðnina er umsækjandi orðinn löglegur félagi. Felli stjórnarfundur inntökubeiðni skal félagsfundur úrskurða um inngöngubeiðni. Synji félagsfundur um inngöngu í félagið getur aðili skotið málinu til viðkomandi landssambands og miðstjórnar ASÍ en úrskurður félagsfundar gildir þar til landssamband eða miðstjórn ASÍ hafa úrskurðað annað. 

6. grein 
Heimilt er að taka í félagið sem aukafélaga unglinga innan 16 ára aldurs, þá sem greiða til félagsins en hafa ekki óskað eftir inngöngu sbr. 4. gr. og aðra sem stunda vinnu samkvæmt þeim samningum sem félagið hefur gert og starfa á starfssvæði félagsins um stundarsakir en eru félagar í öðru félagi. 

Aukafélagar greiða fullt félagsgjald meðan þeir eru á félagssvæðinu, hafa málfrelsi og tillögurétt á fundum félagsins, en hvorki atkvæðisrétt né kjörgengi. Skyldur félagsins gagnvart aukafélögum eru hinar sömu og gagnvart aðalfélögum. 

7. grein 
Fái félagið greitt félagsgjald frá starfsmanni sem starfar á félagssvæðinu en hefur ekki óskað inngöngu skal innan sex mánaða frá því að fyrsta greiðsla barst óska staðfestingar starfsmanns á inngöngu í félagið. 

8. grein 
Úrsögn úr félaginu getur því aðeins átt sér stað að sá sem hyggst segja sig úr félaginu sé skuldlaus. Úrsögn skal vera skrifleg og afhendast skrifstofu félaagsins. Enginn getur sagt sig úr félaginu eftir að atkvæðagreiðsla um vinnustöðvun hefur verið auglýst og þar til vinnustöðvuninni hefur verið aflýst, ef hún hefur verið samþykkt. 

Óheimilt er að segja sig úr félaginu til þess að taka upp vinnu meðlima félags innan Alþýðusambandsins, sem lagt hefur niður vinnu vegna deilu. 

II. kafli. 
Réttindi og skyldur félagsmanna, réttindamissir, brottrekstur. 

9. grein 
Réttindi félagsmanna eru eftirfarandi: 
a) Málfrelsi, tillögu- og atkvæðisréttur á félagsfundum svo og kjörgengi. Atkvæðisréttur um kjarasamninga eftir nánari ákvörðun félagsfundar. 
b) Réttur á styrkjum úr sjóðum félagsins, að uppfylltum þeim skilyrðum sem sett eru í reglugerðum sjóðanna. 
c) Réttur til að vinna eftir þeim kjörum sem samningar félagsins ákveða hverju sinni. 
d) Réttur til aðstoðar félagsins vegna vanefnda atvinnurekenda á samningum. 

Skyldur félagsmanna eru: 
a) Að hlýta lögum félagsins, fundarsköpum, fundarsamþykktum og samningum í öllum greinum. 
b) Að greiða félagsgjöldin á réttum gjalddaga. 
c) Að vinna ekki með ófélagsbundnum mönnum í greininni eftir því sem félags- eða trúnaðarmannaráðsfundur tekur ákvarðanir um. 
d) Að stuðla að því að ófélagsbundnir menn gangi í verkalýðsfélagið og tilkynna til félagsins brot á lögum og samþykktum félagsins. 

10. grein 
Enginn má vera í félaginu sem er atvinnurekandi eða verkstjóri í það stórum stíl, að hann geti haft áhrif á kaupgjald eða lengd vinnutíma. Undantekningu má þó gera á þessu með samþykki miðstjórnar Alþýðu­sambands Íslands. 

11. grein 
Allir félagsmenn eru skyldir að hlíða lögum félagsins og fundar­samþykktum og uppfylla samninga sem það hefur gert við atvinnu­rekendur og aðra. Enginn getur, nema hann beri fram afsökun sem fundur tekur gilda, skorast undan að taka á móti kosningu í stjórn eða útnefningu til annars starfs í þágu félagsins. Þó getur félagi sem starfað hefur fyrir félagið beðist undan endurkjöri jafn langa tíma og hann hefur gegnt starfinu. 

12. grein 
Ef félagsmaður er sakaður um brot á lögum félagsins skal málið tekið fyrir á stjórnarfundi sem ákveður með einföldum meirihluta atkvæða hvort veita skuli áminningu eða víkja félagsmanni úr félaginu. Skjóta má þeim úrskurði til félagsfundar. 

Hver sá maður er rækur úr félaginu í lengri eða skemmri tíma sem að áliti félagsfundar hefur unnið gegn hagsmunum félagsins, bakað því tjón eða gert því eitthvað til vansa, svo og hver sem ekki hlýðir lögum þess eftir gefna áminningu í félaginu. 

Úrskurði félagsfundar um áminningu eða brottvísun félagsmanns má vísa til viðkomandi landssambands og Alþýðusambandsins, en úrskurður félagsfundar gildir þar til sambandið ákveður annað. 

Hafi félagsmanni verið vikið úr félaginu á hann ekki afturkvæmt í félagið nema inntökubeiðni hans sé samþykkt á lögmætum félagsfundi. 

III. Kafli 
Trúnaðarmenn félagsins, skipan þeirra og hlutverk 

13. grein 
Stjórn félagsins skipa sjö menn. formaður, varaformaður og fimm meðstjórnendur. Varamenn skulu vera þrír og skulu þeir taka sæti í forföllum stjórnarmanna í þeirri röð sem þeir eru kosnir til sem fyrsti, annar og þriðji varamaður. Kjörtímabil stjórnar er tvö ár. 

14. grein 
Kosningu stjórnar skal haga þannig að kjósa skal á víxl, þannig að annað árið er kosinn formaður, og tveir meðstjórnendur og varamennirnir þrír en hitt árið varaformaður og þrír meðstjórnendur. 

Ákvæði til bráðabirgða: 
Á stofnfundi félagsins árið 2002 skal kjósa formann og tvo meðstjórn­endur og varamennina þrjá til tveggja ára, en varaformann og þrjá með­stjórnendur til eins árs. 
Á aðalfundi 2003 skal að nýju kjósa varaformann og þrjá meðstjórnendur, en þá til tveggja ára. 
Eftir það fer kosning fram eins og kveðið er á um í 14. grein. 

15. grein 
Formaður kveður til allra funda og stjórnar þeim, heimilt er honum þó að setja fundarstjóra í sinn stað. Formaður eða starfsmaður í umboði hans undirskrifar allar gerðir félagsins. Formaður gætir þess að allir starfsmenn geri skyldur sínar. Hann hefur umsjón með starfsemi félagsins og eftirlit með því að lögum þess og reglum sé framfylgt í öllum greinum. 

16. grein 
Stjórn heldur allar gjörðarbækur félagsins og færir inn í þær fundargjörðir stjórnar og félags, lagabreytingar og niðurstöðutölur aðalreiknings. 

Heimilt er stjórn að lát hljóðrita fundi, upptökurnar skal varðveita á skrifstofu félagsins í minnst fimm ár. Upptökurnar skal varðveita sem trúnaðarmál. 

17. grein 
Stjórn félagsins fylgist með fjárreiðum félagsins og ber upp reikninga þess á aðalfundum. 

Stjórnin ber öll í sameiningu ábyrgð á sjóðum félagsins. 

18. grein 
Skrifstofa félagsins innheimtir árgjöld félagsins og aðrar tekjur þess, hefir á hendi bókfærslu félagsins og sjóði þess skal hún geyma á vöxtum eftir nánari fyrirmælum stjórnar. Síðan skal hún annast bréfaskriftir félagsins í samráði við stjórn og geyma skjöl þess. 

19. grein 
Í trúnaðarmannaráði eiga sæti: Stjórn félagsins og þeir fullgildir félags­menn sem kosnir hafa verið trúnaðarmenn á vinnustöðum. 
Í forföllum aðalmanna taka varastjórnarmenn félagsins sæti í trúnaðar­mannaráði fyrir stjórnarmenn. 

Formaður félagsins skal vera formaður trúnaðarmannaráðs og kveður það til fundar með þeim hætti sem hann telur heppilegastan. 

Hlutverk trúnaðarmannaráðs er m.a.: 
-Að stuðla að og efla fræðslu trúnaðarmanna. 
-Að gera tillögur um stefnu félagsins í mikilsverðum málum 
-Að gera tillögur um atkvæðagreiðslu um verkfallsboðun. 
-Að leggja mat á samninga áður en þeir eru bornir undir atkvæði 

Trúnaðarmannaráð er stjórn félagsins til ráðuneytis og þar skulu rædd þau mál sem varða einstaka vinnustaði og ráðstafanir til að gæta þar hags-muna félagsins og einstakra félagsmanna. Á fundum trúnaðarmannaráðs skulu trúnaðarmenn gefa skýrslur um stöðu mála hver á sínum vinnustað. Formaður getur og í nafni félagsstjórnar kallað saman trúnaðarmannaráð þegar félagsleg vandamál ber að höndum og ekki eru tök á að ná saman félagsfundi, og ræður úrslitum í slíkum málum einfaldur meirihluti fundar. Skulu ákvarðanir slíkra funda færast í gerðabók félagsstjórnar. 

20. grein

Innan félagsins starfar uppstillingarnefnd, kosin á aðalfundi ár hvert. Hún skal skipuð þrem mönnum og einum til vara.

Verkefni hennar er að gera tillögur um menn í stjórn og varamenn þeirra, í samræmi við reglur félagsins um kjör stjórnar.

 

Nefndinni ber að leggja fram tillögur sínar eigi síðar en fyrir lok marsmánaðar. Skulu þær vera félagsmönnum til sýnis á skrifstofu félagsins fram að aðalfundi. Nefndin skal jafnframt um leið auglýsa störf sín og óska eftir fleiri framboðum.

Tillögur nefndarinnar skulu einnig kynntar á heimasíðu félagsins og í staðarblöðum á félagssvæði Bárunnar, stéttarfélags í síðasta lagi hálfum mánuði fyrir aðalfund.

Einstökum félagsmönnum er heimilt að gera tillögur um menn í stjórn allt þar til hálfur mánuður er til aðalfundar. Skriflegt samþykki þeirra manna sem stungið er upp á skal fylgja hverri tillögu. Í enga tillögu má taka nöfn þeirra sem hafa gefið skriflegt leyfi til að nafn þeirra sé sett á aðra tillögu.

 

Til að tillaga sé gild verða bæði þeir sem tilöguna bera fram og þeir sem stungið er upp á að vera fullgildir félagar í Bárunni, stéttarfélagi.

 

21. grein 
Samninganefnd skal vera starfandi í félaginu. Hlutverk hennar er að annast um kjarasamningsgerð fyrir hönd félagsins. Nefndin skal kjörin af félagsfundi. Formaður félagsins skal vera formaður samninganefndar nema annað sé ákveðið í lögum félagsins. Samninganefnd er heimilt að skipta með sér verkum eftir samningssviðum. 

22. grein 
Kjörstjórn skal vera starfandi í félaginu. Hlutverk hennar er að annast um stjórn atkvæðagreiðslna um kjarasamninga, verkföll og allsherjar­atkvæðagreiðslur skv. lögum félagsins. Kjörstjórnin skal kjörin af aðalfundi og í henni skulu eiga sæti tveir menn og tveir til vara. Við stjórnun atkvæðagreiðslna um kjarasamninga og verkföll skipar trúnaðarmannaráð þriðja kjörstjórnarmanninn og skal hann vera formaður kjörstjórnar. Við stjórnun allsherjaratkvæðagreiðslna um önnur atriði skv. lögum félagsins og/eða lögum ASÍ skipar miðstjórn ASÍ þriðja kjörstjórnarmanninn og skal hann vera formaður kjörstjórnar. 

IV. Kafli. Fundir. 

23. grein 
Fundi skal halda í félaginu þegar stjórninni þykir ástæða til, eða þegar 30 félagsmenn krefjast þess skriflega, enda sé tilgreint fundarefni af þeim sem kröfuna gera. 

Krefjist fundarmaður þess að skrifleg atkvæðagreiðsla fari fram á fundi, skal fundarstjóri verða við því. 

Allir fundir eru lögmætir ef til þeirra er boðað með tveggja sólarhringa fyrirvara eða meir, með uppfestum auglýsingum, í héraðsfréttablöðum og/eða í útvarpi. Þó getur stjórn boðað til fundar með styttri fyrirvara ef um vinnudeilur er að ræða, eða sérstakar ástæður gefa tilefni til þess. 

Aðalfund og fund þann sem kjósa skal fulltrúa til sambandsþings skal boða með sjö daga fyrirvara. 

24. grein 
Aðalfundur félagsins skal haldinn eigi síðar en fyrir maílok ár hvert, þar skulu lagðir fram reikningar félagsins endurskoðaðir til athugunar og samþykktar, en stjórn er skylt að láta löggiltan endurskoðanda yfirfara reikninga félagsins í lok reikningsárs. 

Á aðalfundi skulu tekin fyrir þessi mál: 
1. Skýrsla formanns fyrir liðið starfsár. 
2. Endurskoðaðir reikningar félagsins lagðir fram til afgreiðslu. 
3. Kosning stjórnar. 
4. Kosning tveggja félagslegra skoðunarmanna og eins til vara. 
5. Kosning til annarra stjórna og ráða sem lög og reglugerðir félagsins gera ráð fyrir. 
6. Lagabreytingar, ef fyrir liggja. 
7. Ákvörðun félagsgjalda. 
8. Önnur mál. 

V. Kafli. Fjármál 

25. grein 
Félagsgjöld eru ákveðin á aðalfundi og skulu innheimt sem ákveðið hlutfall af launum. 

26. grein 
Af tekjum félags skal greiða öll útgjöld þess, skatt til ASÍ og annan kostnað, er stafar af samþykktum félagsfunda eða stjórnar. Við meiri háttar ráðstafanir á eigum félagsins þarf samþykki félagsfundar. 

27. grein 
Tveir félagslegir skoðunarmenn skulu yfirfara reikninga félagsins fyrir liðið reikningsár og gera athugasemdir sínar við þá. Skoðunarmenn eru kosnir á aðalfundi. Hlutverk þeirra er m.a. að hafa eftirlit með því að fjármunum félagsins sé varið til þeirra verkefna sem félagsfundur og/eða stjórn hafa ákveðið. Auk athugunar hinna félagskjörnu skoðunarmanna er stjórn félagsins skylt að láta löggiltan endurskoðanda endurskoða reikninga og fjárreiður félagsins í lok hvers reikningsárs. Árseikningar félagsins skulu liggja frammi á skrifstofu félagsins, til skoðunar fyrir félagsmenn sjö dögum fyrir aðalfund. 

28. grein 
Sjóðir í eigu eða vörslu félagsins skulu vera: 
Félagssjóður, sjúkrasjóður, orlofsheimilasjóður, vinnudeilusjóður, svo og aðrir sjóðir sem stofnaðir kunna að vera. Allir sjóðir félagsins aðrir en félagssjóður skulu hafa sérstaka reglugerð sem samþykkja þarf á aðalfundi. Reglugerðum sjóða má aðeins breyta á aðalfundi. Reglugerð hvers sjóðs skal tilgreina hlutverk sjóðsins, hverjar tekjur hans skuli vera, hvernig verja skuli fé hans og hvernig honum skuli stjórnað. 

Sjóðir félagsins skulu ávaxtaðir á tryggan hátt í ríkisskuldabréfum, í ríkistryggðum skuldabréfum í bönkum eða í sparisjóðum, í skuldabréfum tryggðum með veði í fasteign eða á annan hátt er stjórn félagsins og trúnaðarmannaráð metur tryggan. Tekjur félagsins skiptast milli sjóðanna samkvæmt ákvæðum í reglugerðum þeirra. 

VI. Kafli. Lagabreytingar 

29. grein 
Komi fram tillaga um að lögbinda félagið við eitthvert annað félag eða félagasamband, eða slíta slíku sambandi, þarf til þess sama atkvæðamagn og um lagabreytingar. Kjósa skal með allsherjaratkvæðagreiðslu um slit á slíku sambandi. 

30. grein 
Lögum þessum má breyta á löglegum fundi í félaginu hvenær sem er, ef breytingin hefur áður verið boðuð í fundarboði og rædd á löglegum fundi. En minnst viku millibil skal þó vera á milli þeirra funda sem breytingar­tillögurnar eru ræddar á. 

Allar breytingartillögur skulu lagðar fram við fyrri umræðu, en atkvæða­greiðslur skulu fara fram við síðari umræðu. 

Allar breytingartillögur skulu vera skriflegar. 

Breytingar á lögunum ná því aðeins gildi, að þær séu samþykktar með tveim þriðju greiddra atkvæða og koma til framkvæmda er miðstjórn Alþýðusambands Íslands hefur staðfest þær. 

Samþykkt á stofnfundi Bárunnar, stéttarfélags 25. júní 2002. 

Breytingar samþykktar á aðalfundi Bárunnar, stéttarfélags 26. apríl 2011.